Um Torget

Torget (torget.is) er endursölumarkaður þar sem einstaklingar geta selt og keypt vörur. Vefurinn er rekinn af Gard ehf., kt. 650826-2560, netfang: hallo@torget.is.

Með því að nota þjónustuna samþykkir þú þessa skilmála.

Innskráning

Ekki þarf að skrá sig inn á Torget til að skoða vörur. Til að stofna aðgang þarftu að vera 18 ára eða eldri og gefa upp fullt nafn og fæðingardag. Þú berð ábyrgð á öllu sem gert er í gegnum þinn aðgang.

Vörur til sölu

Allar vörur skulu vera hreinar og í samræmi við lýsingu. Seljandi ber ábyrgð á að myndir og lýsing gefi rétta mynd af vörunni, þar á meðal göllum. Vara er keypt í því ástandi sem henni er lýst.

Óheimilt er að selja: falsaðar vörur, stolnar vörur, vopn, fíkniefni, lyf, klámefni eða annað sem lög banna.

Torget áskilur sér rétt til að fjarlægja auglýsingar og loka aðgangi notenda sem brjóta gegn þessum skilmálum.

Greiðslur og þjónustugjald

Kaupandi greiðir með korti í gegnum greiðslugátt Rapyd. Greiðslan rennur til Gard ehf., kt. 650826-2560, sem rekur Torget, og er geymd þar til pöntun er lokið, eins og lýst er í kaflanum „Greiðsla til seljanda“. Kortaupplýsingar fara í gegnum Rapyd og eru aldrei vistaðar hjá Torget.

Kaupandi greiðir þjónustugjald Torgets ofan á verð vörunnar og sendingarkostnað. Seljandi greiðir enga þóknun og fær söluverðið greitt án frádráttar. Það kostar ekkert að skrá vörur til sölu á Torget.

Þjónustugjaldið ræðst af verði vörunnar (samþykktu tilboðsverði, hafi tilboð verið samþykkt):

Hlutfallið sem á við ræðst af verði vörunnar og gildir um allt verðið, ekki aðeins hluta þess. Til að gjaldið lækki aldrei þótt verðið hækki er breytilegi hluti þess í hverju verðbili aldrei lægri en hann var í efri mörkum fyrra verðbils. Að auki bætist við fast gjald, 149 kr., á hverja pöntun. Breytilegi hlutinn er þó aldrei hærri en 4.900 kr., þannig að hæsta mögulega þjónustugjald er 5.049 kr. Gjaldið er námundað að heilli krónu.

• Vara á 15.000 kr.: 1.049 kr. þjónustugjald.
• Vara á 25.000 kr.: 1.349 kr. þjónustugjald.
• Vara á 40.000 kr.: 1.749 kr. þjónustugjald.
• Vara á 100.000 kr.: 2.649 kr. þjónustugjald.

Heildarverð kaupanda er uppsett eða umsamið verð vörunnar, þjónustugjald og sendingarkostnaður. Verðið birtist á greiðslusíðunni áður en greitt er.

Seljandi getur sett vöru í sölu og selt hana án þess að hafa skráð bankaupplýsingar. Til að fá greitt þarf hann hins vegar að skrá íslenskan bankareikning ásamt kennitölu; við biðjum um þessar upplýsingar eftir fyrstu sölu, ekki þegar vara er sett í sölu. Bankareikningur skal vera á kennitölu seljanda.

Tilboð

Þú getur gert seljanda tilboð í vöru. Tilboð þarf að vera lægra en verðið og að minnsta kosti 60% af því. Samþykkt tilboð gildir í 48 klukkustundir. Kaupir þú ekki innan þess tíma fellur tilboðið úr gildi og skráð verð gildir. Lækki seljandinn verðið niður í tilboðið eða lægra fellur tilboðið úr gildi.

Afhending

Afhending fer fram í gegnum Dropp:

• Seljandi skal koma vörunni til Dropp innan sjö daga frá því að hann fær tilkynningu um söluna og pakka henni vel. Seljandi sækir sendingarmiðann á Torget. Taki afhendingarstaðurinn ekki við pakkanum getur seljandi látið Torget vita á pöntunarsíðunni. Þá stöðvast fresturinn þar til Torget hefur skoðað málið.
• Sending telst send þegar Dropp staðfestir að hún hafi verið móttekin. Berist varan ekki til Dropp innan frestsins er salan felld niður og kaupandinn fær allt endurgreitt.
• Kaupandi greiðir sendingarkostnað, sem bætist við uppgefið verð vörunnar.
• Pakkinn má vera allt að 10 kg og ekki stærri en venjulegur flutningakassi. Stærri hluti, til dæmis húsgögn, er ekki hægt að senda með Torget enn sem komið er.
• Sending telst týnd ef Dropp merkir hana týnda eða ef hún er enn í flutningi 14 dögum eftir að Dropp tók við henni án þess að hafa verið afhent.
• Þegar sending telst týnd fer málið sjálfkrafa í skoðun hjá Torget, sem kannar það hjá Dropp og lýkur skoðuninni innan sjö daga; kaupandi fær tilkynningu þegar skoðun hefst.
• Reynist sendingin týnd endurgreiðir Torget kaupanda kaupverðið að fullu, ásamt sendingarkostnaði og þjónustugjaldi. Seljandi fær greiðslu sína, enda hafi hann afhent sendinguna til Dropp innan tilskilins frests, og Torget annast kröfu á hendur Dropp vegna tjónsins.
• Komi sendingin í leitirnar eftir að endurgreiðsla hefur farið fram skal kaupandi tilkynna Torget innan sjö daga og velja annaðhvort að halda vörunni og greiða kaupverðið á ný eða skila henni til seljanda. Torget greiðir þá sendingarkostnaðinn.
• Seljandi skal pakka vörunni samkvæmt leiðbeiningum Torgets um innpökkun: hver vara skal fara í kassa eða bólstrað umslag, brothættar vörur í kassa með fyllingu. Skemmist vara vegna ófullnægjandi umbúða er það á ábyrgð seljanda: kaupandi fær endurgreitt að athugun Torgets lokinni og tjónið fellur á seljanda.
• Meðan sending er í flutningi gilda ábyrgðarskilmálar Dropp. Um skemmdir og annað sem fer úrskeiðis gilda reglur kaflans „Ábyrgð Torgets“ hér að neðan, og um týndar sendingar reglur kaflans „Skil og endurgreiðslur“.
• Kaupandi skal sækja sendinguna innan sjö daga frá því að hún kemur á afhendingarstað Dropp. Sé hún ekki sótt fellur salan niður og kaupandi fær verð vörunnar endurgreitt en þjónustugjald og sendingarkostnaður eru ekki endurgreidd. Torget lætur Dropp senda vöruna til baka til seljanda og greiðir þann sendingarkostnað. Seljandi greiðir ekkert, en fær heldur ekki greitt fyrir söluna. Auglýsingin er falin svo seljandi geti sett vöruna aftur í sölu.
• Sæki kaupandi ítrekað ekki sendingar getur Torget takmarkað möguleika hans á að kaupa á síðunni eða lokað aðgangi hans.
• Sendi seljandi ítrekað ekki vöru sem hann hefur fengið sendingarmiða fyrir getur Torget takmarkað möguleika hans á að selja á síðunni eða lokað aðgangi hans. Sama gildir sé netfang seljanda þannig að tilkynningar um sölu komist ekki til skila; þá er ekki hægt að selja fyrr en netfangið hefur verið lagfært.

Greiðsla til seljanda

Greiðsla kaupanda er geymd hjá Gard ehf. þar til pöntuninni er lokið. Pöntuninni er lokið 48 klukkustundum eftir að Dropp staðfestir afhendingu, ef kaupandinn hefur ekki gert athugasemd. Staðfesti kaupandinn fyrr að allt sé í lagi lýkur henni strax.

Þegar pöntuninni er lokið millifærir Gard ehf. söluverðið á bankareikninginn þinn innan nokkurra virkra daga. Þú færð það verð sem kaupandinn greiddi fyrir vöruna. Engin þóknun er dregin frá. Kaupandinn borgar þjónustugjaldið og sendingarkostnaðinn.

Tímalínan er þessi:

1. Kaupandi greiðir í gegnum Rapyd og Torget staðfestir greiðsluna.
2. Seljandi kemur vörunni til Dropp innan sjö daga.
3. Dropp staðfestir afhendingu til kaupanda. Þá hefur kaupandinn 48 klukkustundir til að gera athugasemd við vöruna.
4. Að þeim tíma liðnum, eða þegar kaupandinn staðfestir að allt sé í lagi, er pöntuninni lokið.
5. Innan nokkurra virkra daga millifærir Gard ehf. söluverðið á bankareikninginn þinn.

Hvað stöðvar útborgun: opin athugasemd. Frá því að kaupandinn gerir athugasemd og þar til málinu er lokið er greiðslan til þín sett á bið. Sé athugasemd hafnað, eða segir þú að eitthvað sé að vöru sem var skilað og Torget fellst á það, færðu greitt innan nokkurra virkra daga. Sé athugasemd samþykkt fær kaupandinn endurgreitt og þú færð ekki greitt fyrir söluna. Undantekning er týnd sending sem Dropp hafði tekið við: þá færðu greitt þótt kaupandinn fái endurgreitt, sjá kaflann „Skil og endurgreiðslur“.

Bankaupplýsingar seljanda: til að fá greitt þarf seljandi að hafa skráð gildan íslenskan bankareikning (12 tölustafir) og kennitölu, og skal reikningurinn vera á kennitölu seljanda. Nafnið sem seljandi staðfestir þarf að passa við eiganda reikningsins. Vanti bankareikning eða kennitölu, eða séu þessar upplýsingar ógildar, er útborgun frestað þar til seljandi hefur skráð þær eða lagfært, og hefur Torget þá samband við seljanda. Frestur til millifærslu reiknast frá því að bankaupplýsingar eru komnar í lag.

Óskráðar bankaupplýsingar. Söluverðið er aldrei fellt niður vegna þess að bankaupplýsingar vantar. Greiðsla fer fram þegar seljandi hefur skráð upplýsingarnar og þangað til bíður söluupphæð hjá Gard ehf. Við sendum seljanda áminningu í tölvupósti þegar salan er tilbúin til útborgunar, aftur viku síðar og loks 30 dögum eftir fyrstu áminningu; eftir það sendum við ekki fleiri áminningar.

Skil og endurgreiðslur

Ekki er hægt að skila vöru af þeirri ástæðu einni að kaupandi hafi skipt um skoðun.

Kaupandi getur þó gert athugasemd við vöru innan 48 klukkustunda frá afhendingu ef vara er ekki í samræmi við lýsingu eða er skemmd. Á meðan athugasemd er í skoðun er útborgun til seljanda fryst. Seljandi hefur 48 klukkustundir til að samþykkja athugasemdina eða vísa henni til Torgets; svari hann ekki fer athugasemdin sjálfkrafa til Torgets til úrskurðar.

Sé athugasemd samþykkt, eða úrskurðuð þér í hag, sendir þú vöruna til baka með sendingarmiða frá Torget. Torget borgar sendinguna. Þú hefur sjö daga til að koma pakkanum til Dropp. Gerir þú það ekki er málinu lokað og seljandinn fær greitt. Þegar varan er komin aftur til seljanda hefur hann 48 klukkustundir til að skoða hana. Sé allt í lagi, eða segi hann ekkert, færðu allt endurgreitt: vöruverð, þjónustugjald og sendingarkostnað. Segi seljandinn að eitthvað sé að vörunni fer málið til Torgets. Torget sker þá úr um hvort þú færð endurgreitt eða ekki.

Torget endurgreiðir þér þegar vara reynist ekki í samræmi við lýsingu eða er skemmd: annaðhvort þegar seljandi hefur samþykkt athugasemdina eða þegar Torget hefur úrskurðað þér í hag. Endurgreiðslan fer á kortið sem þú borgaðir með og berst innan nokkurra virkra daga.

Týndar sendingar. Sending telst týnd ef Dropp merkir hana týnda eða ef hún er enn í flutningi 14 dögum eftir að Dropp tók við henni án þess að hafa verið afhent. Torget skoðar þá málið sjálfkrafa og lýkur skoðuninni innan sjö daga. Reynist sendingin týnd fær kaupandi allt endurgreitt (vöruverð, þjónustugjald og sendingarkostnað) án þess að þurfa að sýna fram á tjón. Endurgreiðslan fer á kortið sem greitt var með og berst innan nokkurra virkra daga. Sending sem bíður þess að kaupandi sæki hana á afhendingarstað Dropp telst ekki týnd.

Greiðsla til seljanda þegar sending týnist. Hafi Dropp tekið við sendingunni ber Torget tjónið. Seljandinn fær þá greitt fyrir söluna innan nokkurra virkra daga eftir að kaupandinn hefur fengið endurgreitt. Hafi Dropp aldrei tekið við sendingunni fær seljandinn ekki greitt. Telji seljandinn að Dropp hafi tekið við sendingunni getur hann sent Torget kvittun eða sendingarnúmer og Torget fer þá yfir málið.

Gerir þú ekki athugasemd innan 48 klukkustunda telst varan samþykkt og seljandinn fær greitt. Sé athugasemd hafnað stendur salan og seljandinn fær greitt. Það sama gildir ef seljandinn segir að eitthvað sé að vöru sem þú skilaðir og Torget fellst á það: þá færðu ekki endurgreitt og seljandinn fær greitt.

Umsagnir

Þegar pöntun er lokið geta kaupandi og seljandi gefið hvor öðrum umsögn. Umsögn er allt að 300 stafir og þú getur breytt henni í 24 klukkustundir. Umsagnir birtast þegar báðir hafa skrifað, eða eftir 14 daga. Umsagnir um þig sjást á prófílnum þínum. Ekki er hægt að gefa umsögn um pöntun þar sem gerð var athugasemd eða vöru var skilað.

Aðgangurinn þinn

Þú getur eytt aðganginum þínum í stillingum. Það er ekki hægt á meðan pöntun eða mál er í gangi. Óseldar auglýsingar þínar hverfa. Upplýsingar um pantanir sem þú hefur átt eru geymdar samkvæmt bókhaldslögum, án nafns, kennitölu, bankareiknings og netfangs.

Þú getur lokað á notanda. Þá getur viðkomandi hvorki sent þér skilaboð né keypt af þér og fær ekki að vita af því. Samtal um pöntun sem er í gangi helst opið þar til henni er lokið. Þú getur líka tilkynnt notanda, auglýsingu eða samtal til Torgets. Sá sem þú tilkynnir fær ekki að vita af því.

Ábyrgð Torgets

Sé vara skemmd, þ.m.t. ef hún skemmist í flutningi, eða ekki í samræmi við lýsingu, er kaupverðið endurgreitt í gegnum athugasemdaferlið sem lýst er í kaflanum „Skil og endurgreiðslur“. Týnist sending er kaupanda endurgreitt að fullu samkvæmt sama kafla.

Umfram það takmarkast ábyrgð Torgets gagnvart notanda við kaupverð viðkomandi pöntunar, þ.e. verð vörunnar, þjónustugjald og sendingarkostnað. Ábyrgðin nær ekki til óbeins tjóns, svo sem glataðs hagnaðar eða tíma.

Brot á skilmálum

Óheimilt er að beina viðskiptum með skráðar vörur út fyrir vefinn. Brot á þessu getur valdið lokun aðgangs.

Samskipti

Öll samskipti á Torget skulu fara fram af kurteisi og virðingu.

Lög og varnarþing

Um skilmála þessa gilda íslensk lög. Rísi ágreiningur skal hann rekinn fyrir Héraðsdómi Reykjavíkur. Neytendur geta jafnframt leitað til Neytendastofu.

Breytingar

Torget áskilur sér rétt til að breyta skilmálum þessum með 14 daga fyrirvara. Áframhaldandi notkun þjónustunnar telst samþykki á breyttum skilmálum.

Ábyrgðaraðili

Gard ehf., kt. 650826-2560, netfang: hallo@torget.is

Vinnsla persónuupplýsinga er í samræmi við lög nr. 90/2018 og almennu persónuverndarreglugerð ESB (GDPR).

Hvaða upplýsingum söfnum við?

• Aðgangsupplýsingar: Notandanafn, fornafn, netfang, fæðingardagur og dulkóðað lykilorð. Eftirnafn biðjum við um þegar þú selur eða kaupir í fyrsta sinn. Fullt nafn er notað á sendingarmiða og við útborgun. Fæðingardagur er notaður til að staðfesta að þú sért 18 ára eða eldri.
• Sendingarupplýsingar: Nafn og símanúmer við hverja pöntun. Heimilisfang og póstnúmer kaupanda eru aðeins vistuð þegar hann velur heimsendingu. Fyrir pantanir sem sóttar eru á afhendingarstað Dropp vistum við ekkert heimilisfang, aðeins valinn afhendingarstað. Seljandi getur skráð heimilisfang og póstnúmer í stillingum; það er notað ef vöru er skilað til hans.
• Kennitala: Seljendur skrá kennitölu til að fá greitt út. Við biðjum um hana eftir fyrstu sölu, ekki þegar vara er sett í sölu. Kennitalan er ekki send Dropp.
• Bankaupplýsingar: Reikningsnúmer seljenda til útborgunar. Beðið er um það eftir fyrstu sölu, ekki þegar vara er sett í sölu. Starfsfólk Torgets skoðar þær aðeins til að framkvæma útborgun og hver skoðun er skráð. Kortaupplýsingar kaupenda eru unnar af Rapyd og eru aldrei vistaðar hjá okkur.
• Söluupplýsingar: Myndir, lýsingar og verð á vörum sem þú setur í sölu.
• Athugasemdir og myndir: Geri kaupandi athugasemd við vöru, eða seljandi við vöru sem var skilað, eru lýsingin og myndirnar sem viðkomandi hleður upp vistaðar. Myndirnar eru geymdar í lokuðu geymsluhólfi. Aðeins kaupandinn, seljandinn í málinu og starfsfólk Torgets hafa aðgang að þeim.
• Skrá yfir tölvupósta: Við skráum hvaða tölvupóstar hafa verið sendir vegna pantana (viðtakandi, efni og tími) til að geta sýnt fram á tilkynningar ef ágreiningur kemur upp.
• Tækniupplýsingar: IP-tala, tegund vafra og heimsóknartímar.
• Leitarskrá: Við skráum að hverju er leitað á Torget (leitartexta, fjölda niðurstaðna, hvaða síur voru notaðar og hvort smellt var á niðurstöðu) í þeim tilgangi að bæta leitina. Skráin geymir hvorki notandaauðkenni né IP-tölu og er ekki tengd við aðganginn þinn. Þar sem hver sem er getur skrifað hvað sem er í leitarreit, til dæmis nafn, er hverri færslu eytt sjálfkrafa eftir 90 daga.

Hvernig við notum upplýsingarnar

Við vinnum persónuupplýsingar til að geta rekið þjónustuna, miðlað greiðslum, útbúið og fylgt eftir sendingum, greitt út söluandvirði, sent tilkynningar um pantanir og uppfyllt lagaskyldur. Grundvöllur vinnslunnar er framkvæmd samnings við þig, lögmætir hagsmunir og lagaskylda.

Hvað sjá aðrir notendur?

Seljandi sér nafn kaupanda og hvernig varan er afhent. Seljandi sækir sendingarmiðann sjálfur og sér því það sem á honum stendur: við heimsendingu nafn, heimilisfang og símanúmer kaupanda, en við afhendingu á afhendingarstað Dropp nafn og símanúmer kaupanda og afhendingarstaðinn. Kaupandi sér notandanafn seljanda og upplýsingar um vöruna. Ef vöru er skilað sækir kaupandinn sendingarmiða frá Dropp. Á honum stendur nafn og símanúmer seljanda, afhendingarstaðurinn sem hann valdi og heimilisfang hans ef það er skráð.

Allir geta séð hverjum þú fylgir og hverjir fylgja þér.

Þriðju aðilar

Við seljum aldrei persónuupplýsingar. Við deilum upplýsingum aðeins með:

• Rapyd (greiðslugátt): Kaupandi greiðir með korti hjá Rapyd. Rapyd fær kortaupplýsingar kaupanda og upphæð pöntunarinnar; greiðslan rennur til Gard ehf.
• Dropp (sendingar): Nafn, símanúmer, netfang og afhendingarstaður kaupanda, og heimilisfang og póstnúmer við heimsendingu, til að útbúa og afhenda sendinguna. Kennitala er ekki send. Þegar vöru er skilað fær Dropp nafn, símanúmer og netfang seljanda og afhendingarstaðinn sem hann valdi, og heimilisfang og póstnúmer seljanda ef þau eru skráð. Þegar þú opnar kort Dropp til að velja afhendingarstað keyrir forrit frá Dropp í vafranum þínum. Dropp og kortaþjónustan Mapbox fá þá IP-tölu þína og upplýsingar um vafrann, áður en nokkur pöntun verður til. Mapbox vistar líka nafnlaust auðkenni í vafranum.
• Resend (tölvupóstur): Resend sendir tölvupóstana okkar, t.d. um pantanir, sendingar, greiðslur, skilaboð, tilboð og verðlækkanir.
• Hýsingaraðilum: Supabase (gagnagrunnur, innskráning og geymsla mynda) og Vercel (vefhýsing og keyrsla þjónsins).
• Vercel Web Analytics: telur heimsóknir á síðuna án vafrakaka og án þess að bera kennsl á þig.
• Stjórnvöldum: Ef lagaskylda krefst.

Hvar gögn eru unnin

Vefþjónusta Torgets (Vercel) er hýst í Frankfurt í Þýskalandi. Gagnagrunnur og geymsla mynda (Supabase) eru hýst í Frankfurt í Þýskalandi. Tölvupóstar eru sendir í gegnum Resend, sem vinnur þá á Írlandi. Vercel og Supabase eru bandarísk fyrirtæki. Um þau gilda stöðluð samningsákvæði Evrópusambandsins um flutning persónuupplýsinga, og gildir það þótt gögnin séu hýst á Evrópska efnahagssvæðinu.

Aðrir þjónustuaðilar sem taldir eru upp hér að ofan (Rapyd, Dropp og Resend) vinna þær upplýsingar sem lýst er í köflunum um þá, á eigin kerfum og samkvæmt eigin persónuverndarstefnu.

Varðveislutími

Aðgangsupplýsingum er eytt þegar þú lokar aðganginum. Það er ekki hægt á meðan pöntun eða mál er í gangi. Viðskiptagögn (pantanir, greiðslur og athugasemdir) eru varðveitt í sjö ár samkvæmt bókhaldslögum, en án persónuupplýsinga: nafni, kennitölu, bankareikningi og netfangi er eytt og eftir stendur auðkenni sem pöntunin vísar í. Afhendingarupplýsingum pöntunar (heimilisfangi, símanúmeri, nafni á sendingarmiða og myndum) er eytt 90 dögum eftir afhendingu. Leitarskrá og skrá um senda tölvupósta eru hreinsaðar eftir 90 daga.

Réttindi þín

Þú átt rétt á að fá aðgang að persónuupplýsingum um þig, fá þær leiðréttar eða fá þeim eytt. Sendu erindi á hallo@torget.is. Við svörum innan 30 daga. Þú getur einnig leitað til Persónuverndar (personuvernd.is).

Öryggi

Gögn eru dulkóðuð í flutningi (HTTPS). Lykilorð eru geymd dulkóðuð. Kortaupplýsingar eru aldrei vistaðar á okkar kerfum. Símanúmer og heimilisföng pantana eru geymd aðskilin frá pöntuninni sjálfri.

Vafrakökur

Við notum aðeins nauðsynlegar vafrakökur til að halda innskráningunni þinni virkri. Engar greiningarkökur eða þriðja aðila auglýsingakökur eru á síðunni. Ef þú opnar kort Dropp vistar Mapbox nafnlaust auðkenni í vafranum, eins og lýst er hér að ofan.

Við söfnum nafnlausri tölfræði um heimsóknir, til dæmis hvaða síður eru skoðaðar og hvaðan gestir koma, án vafrakaka og án þess að hægt sé að rekja hana til þín.